Agenda a Chofnodion

Bydd Keith Bush, Cyfarwyddwr Gwasanaethau Cyfreithiol, yn gadael y Cynulliad ym mis Hydref. Diolchodd y Llywydd a'r Comisiynwyr i Keith am ei gyngor a'i wasanaeth arbenigol ac amhrisiadwy yn ystod ei amser yn y Cynulliad a dymuno'n dda iddo yn y dyfodol. 

Ni chafwyd unrhyw ddatganiadau o fuddiant.

Cytunodd y Comisiynwyr ar gofnodion 12 Gorffennaf 2012.

Papur 2

Mae'r Rheolau Sefydlog yn ei gwneud yn ofynnol i'r Comisiwn osod ei gyllideb ddrafft yn flynyddol erbyn 1 Hydref.  Mae cyllideb ddrafft 2013-14 y Comisiwn yn nodi'r adnoddau ariannol sydd eu hangen i ddarparu gwaith Gwasanaethau'r Cynulliad sy'n flaenoriaeth yn ogystal â'r gyllideb sydd ei hangen i ariannu Penderfyniad y Bwrdd Taliadau ar gyfer Aelodau'r Cynulliad. 

Cytunodd y Comisiwn ar ei gyllideb ddrafft, a gofyn iddo gael ei osod yn unol â'r Rheolau Sefydlog.  Bydd Angela Burns AC, y Comisiynydd â chyfrifoldeb dros adnoddau, yn mynd i gyfarfod y Pwyllgor Cyllid ar 3 Hydref 2012 i sesiwn graffu ar y gyllideb ddrafft.

Diolchodd y Comisiynwyr i'r swyddogion am eu gwaith ar y gyllideb ddrafft hyd yma.

Cytunwyd na fyddai'r papur yn cael ei gyhoeddi gan y byddai'r gyllideb ddrafft yn cael ei gosod y diwrnod canlynol.

Cam i'w gymryd: Swyddogion i osod dogfen cyllideb ddrafft 2013-14 gerbron y Cynulliad ar 28 Medi 2012

Papur 3

Bydd Cytundeb Merlin, ar gyfer darparu gwasanaethau TGCh i'r Cynulliad, yn dod i ben yn 2014.  Mae'n ofynnol bod y Comisiwn yn hysbysu Llywodraeth Cymru ac Atos o'i benderfyniad ynghylch darparu gwasanaethau TGCh i'r Cynulliad yn y dyfodol erbyn mis Ebrill 2013. 

Ym mis Tachwedd 2011, cytunodd y Comisiwn i asesu dau opsiwn: ymestyn cytundeb Merlin; neu symud at ddarpariaeth fewnol gymysg.

Ystyriodd y Pwyllgor ei strategaeth ddrafft ar gyfer gwasanaethau TGCh yn y dyfodol a chytuno i ddod i benderfyniad o ran darpariaeth gwasanaethau TGCh yn y dyfodol ym mis Tachwedd 2012.

Bydd y Comisiynwyr yn trafod hyn ymhellach mewn cyfarfod ychwanegol ym mis Hydref. 

Cytunwyd na fyddai'r papur yn cael ei gyhoeddi oherwydd natur fasnachol ei gynnwys.

Cam i'w gymryd: Swyddogion i ddarparu costau manylach.

Trafododd y Comisiwn drafodion Cyfnod 3 a 4 y Bil, sydd i ddigwydd yn y Cyfarfod Llawn ddydd Mercher 3 Hydref, a chlywed y wybodaeth ddiweddaraf ar faterion yn ymwneud â'r Bil a'r Cynllun.

Diolchodd y Comisiynwyr i'r swyddogion am eu hymdrechion hyd yma yn cefnogi'r Bil wrth iddo gael ei ystyried gan y Cynulliad.

Papur 4

Rhannodd y Comisiynwyr y wybodaeth ddiweddaraf am faterion yn ymwneud â'u portffolios.

Darparu cefnogaeth seneddol o'r radd flaenaf

Mae’r gweithgareddau a ganlyn yn mynd rhagddynt: datblygu technoleg XML ar gyfer trafodion y Cyfarfod Llawn, datblygu Ap ar gyfer y Cynulliad, ac ymestyn cyfleusterau di-wifr ar draws yr ystâd.

Defnyddio adnoddau'n ddoeth

Clywodd y Comisiynwyr y wybodaeth ddiweddaraf am adolygiad y Bwrdd Taliadau Annibynnol o staff Aelodau'r Cynulliad a'r adolygiad o drefniadau pensiwn Aelodau'r Cynulliad.

Papur 6

Cafodd y Comisiwn y wybodaeth ddiweddaraf ar lafar yng nghyfarfod y Comisiwn ar 12 Gorffennaf, ond nid oedd y cofnodion ar gael i'w cymeradwyo yn y cyfarfod hwnnw.  Nododd y Comisiwn y cofnodion.

Clywodd y Comisiynwyr fod set newydd o Gynghorwyr Annibynnol yn cael eu recriwtio ar hyn o bryd.

Rhoddodd Keith Bush y wybodaeth ddiweddaraf i'r Comisiynwyr am yr her i gymhwysedd y Cynulliad o ran Bil Is-ddeddfau Llywodraeth Leol (Cymru).

Yr Ysgrifenyddiaeth

Medi 2012