P-05-878 Rhaid cau’r drws yn glep ar wastraffu ynni
P-05-878 Rhaid cau’r drws yn glep ar wastraffu ynni
P-05-878 - Rhaid cau’r drws yn glep ar wastraffu ynni
Cyflwynwyd y ddeiseb hon gan Jonathan Burton, ar ôl
casglu cyfanswm o 91 lofnodion.
Geiriad y ddeiseb:
Rydym yn galw ar Gynulliad
Cenedlaethol Cymru i annog Llywodraeth Cymru i annog pob archfarchnad a
manwerthwr i osod drysau ar eu holl oergelloedd a rhewgelloedd, i leihau ein
hôl troed carbon cenedlaethol, i leihau'r defnydd o drydan ac i baratoi ar
gyfer Cymru fwy gwyrdd.
Mae Supervalu, manwerthwr o Iwerddon, yn
amcangyfrif y byddai oergell gyffredin 2.5 metr o gyfaint, ag iddi ddrysau, yn
arbed 10,000kWh y flwyddyn yn arferol, o'i gymharu ag oergelloedd nad oes
ganddynt ddrysau [1].
Mae hyn yn cyfateb i 7 tunnell o nwy tŷ
gwydr carbon deuocsid, a fyddai'n ddigon i bweru o leiaf ddau gartref â thrydan
am flwyddyn! Byddai'r pŵer a arbedir o un oergell sydd â drysau yn ddigon
i bweru dau gartref! [2]
Mae Deddf yr Amgylchedd (Cymru), a ddaeth i rym
ym mis Mawrth 2016 [3] (Rhan 2: Newid yn yr Hinsawdd) yn rhoi "pwerau i
Weinidogion Cymru bennu targedau statudol o ran lleihau allyriadau, gan gynnwys
o leiaf 80% o ostyngiad mewn allyriadau erbyn 2050, ac i gyflwyno cyllidebau
carbon er mwyn helpu i gyrraedd y targedau hynny. Mae hyn yn hanfodol yng nghyd-destun ein
hymrwymiadau Prydeinig ac Ewropeaidd ac yn gosod llwybr clir ar gyfer
datgarboneiddio. Mae hefyd yn rhoi sicrwydd ac eglurder i fusnesau a
buddsoddwyr."
Mae hwn yn gyfle gwych i Lywodraeth Cymru
weithio tuag at y nod hwn a chyfrannu at y gostyngiad o 80 y cant mewn
allyriadau erbyn 2050. Gallai'r Ddeddf hon arwain at ganlyniadau enfawr yn
genedlaethol ac yn fyd-eang! Beth am i Gymru fod yn wlad flaenllaw ar y llwyfan
rhyngwladol, gydag amgylchedd "iach a chydnerth" [3] drwy gau'r drws
yn glep ar wastraffu ynni, a hynny ar gyfer y genhedlaeth hon a'r genhedlaeth
nesaf!
Gwybodaeth
ychwanegol:
Dywed yr Asiantaeth Ymchwilio Amgylcheddol mewn adroddiad
'iasol' [4], pe bai manwerthwyr yn rhoi drysau ar oergelloedd, byddent yn
lleihau eu defnydd o ynni gan gymaint â 33 y cant, a byddai bil ynni'r DU 1 y
cant yn llai pe bai'r pum brif archfarchnad yn gosod drysau ar eu hoergelloedd.
Mae clymblaid o gyrff anllywodraethol Ewropeaidd
wedi cyfeirio at adroddiad, y gofynnodd y Comisiwn Ewropeaidd amdano, sy'n
datgan y byddai hyd at 58TWh o bŵer yn cael ei arbed erbyn 2030 ledled
Ewrop pe bai archfarchnadoedd a manwerthwyr yn rhoi drysau ar eu hoergelloedd
a'u rhewgelloedd. Mae hyn yn cyfateb i 25 safle pŵer glo o faint canolig.
Fe wnaethant ddweud hefyd:" the step to install doors on supermarket
fridges and freezers is a no-brainer. Retailers will benefit from lower energy
bills, a more climate conscious image, and ultimately, happier consumers. It's
a win-win for everyone, especially for the environment. Because of climate
change, we simply can't afford to be so careless with energy any longer."
[5]
[1] Tîm Gofal Cwsmer, Adran Cyfathrebu,
SuperValu. Dydd Iau 7 Medi 2017. Mae SuperValu, y manwerthwr o Iwerddon, yn
dyfynnu'r ffigurau hyn yn uniongyrchol gan wneuthurwr ei oergelloedd.
[2] Swyddfa Marchnadoedd Nwy a Thrydan Ofgem.
Gwerthoedd Defnydd Domestig Arferol. Ar gael o: https://www.ofgem.gov.uk/gas/retail-market/monitoring-data-and-statistics/typical-domestic-consumption-values
[Mynediad: dydd Gwener 11 Ionawr 2019]
[3] Llywodraeth Cymru. Deddf yr Amgylchedd
(Cymru) 2016 http://gov.wales/topics/environmentcountryside/consmanagement/natural-resources-management/environment-act/?skip=1&lang=cy
[Mynediad: dydd Gwener 11 Ionawr 2019]
[4] Yr Asiantaeth Ymchwilio Amgylcheddol,
Chilling Facts VI: Closing the door on HFCs. 2014; tudalen 14. Ar gael o: https://eia-international.org/report/the-chilling-facts-vi-closing-the-door-on-hfcs/
[Mynediad: dydd Gwener 11 Ionawr 2019].
[5] Coolproducts, Pam nad oes gan oergelloedd
archfarchnadoedd ddrysau? Ar gael o: https://www.coolproducts.eu/news/why-dont-supermarket-fridges-have-doors
[Mynediad - dydd Sadwrn 12 Ionawr 2019]
Statws
Yn ei gyfarfod ar 19/12/2019 penderfynodd y Pwyllgor
Deisebau fod y ddeiseb hon wedi'i chwblhau.
O ystyried yr ymatebion a gafwyd
gan archfarchnadoedd mawr, a'r cyfyngiadau ar bwerau Llywodraeth Cymru i fynnu
gweithredu yn y maes hwn, cytunodd y Pwyllgor i gau'r ddeiseb ar y sail na all
gymryd camau gweithredu ystyrlon pellach o ran y ddeiseb.
Gellir gweld manylion llawn ynghylch trafodaeth y
pwyllgor o'r ddeiseb hon a'r dogfennau cysylltiedig ar y tab Cyfarfodydd uchod.
Cafodd ei hystyried gyntaf gan y Pwyllgor Deisebau
ar 21/05/2019.
Etholaeth
a Rhanbarth y Cynulliad
- Gorllewin Caerdydd
- Canol De Cymru
Rhagor
o wybodaeth
- Dysgwch fwy am broses ddeisebau'r Cynulliad
- Llofnodwch e-ddeiseb
- Sut mae proses Ddeisebu yn gweithio
Math o fusnes: Deiseb
Rheswm dros ei ystyried: Busnes y Senedd;
Statws: Wedi’i gwblhau
Cyhoeddwyd gyntaf: 14/05/2019