Cyfrifon Llywodraeth Ganolog

Cyhoeddodd Archwilydd Cyffredinol Cymru ei adroddiad ar Gyfrifon Llywodraeth Ganolog  2015-16 ar 18 Mai 2017.

Dyma'r adroddiad blynyddol cyntaf ar yr archwiliadau o ddatganiadau ariannol cyrff llywodraeth ganolog. Mae'n crynhoi canlyniadau gwaith archwilio ar gyfer 2015-16 a gwblhawyd mewn cyrff llywodraeth ganolog (cyrff a archwilir) yng Nghymru.

Mae cyrff llywodraeth ganolog yng Nghymru yn darparu ystod eang o wasanaethau, ac wrth wneud hynny, yn gwario swm sylweddol o arian cyhoeddus. Fel pob corff cyhoeddus, mae gofyn iddynt gynhyrchu, a chael wedi'u harchwilio, set o ddatganiadau ariannol blynyddol (cyfrifon) i ddangos ac adrodd ar stiwardiaeth yr arian cyhoeddus a ymddiriedir iddynt, ac maent yn cael eu dwyn i gyfrif am wneud hynny.

Mae cynhyrchu cyfrifon cywir ac amserol yn dasg sylweddol, ond yn angenrheidiol i ddangos atebolrwydd am stiwardiaeth a llywodraethu arian cyhoeddus. Gall methu â chyhoeddi cyfrifon o'r fath mewn modd amserol adlewyrchu'n wael ar y corff a archwilir, gan danseilio ei drefniadau rheoli ariannol a llywodraethu corfforaethol, yn ogystal â'r hyder cyffredinol yn y sefydliad.

Bydd y fframwaith cyfrifyddu a llywodraethu sy'n berthnasol i bob corff llywodraeth ganolog yn cael ei ddiffinio gan ei fframwaith cyfreithiol a rheoleiddiol. Bydd hyn yn pennu ffurf a chynnwys y datganiadau ariannol ac unrhyw ofynion adrodd eraill megis eu Hadroddiad Blynyddol, ac unrhyw derfynau amser ar gyfer yr archwiliad a chyhoeddi'r dogfennau hyn.

Mae'r sector llywodraeth ganolog wedi wynebu nifer o heriau sylweddol. Y fwyaf nodedig yw'r pwysau ariannol parhaus tuag i lawr ar gyllidebau, sydd ochr yn ochr â'r fframwaith cyfreithiol a rheoleiddio sy'n newid (gofynion cyfrifyddu newydd ar gyfer cyrff elusennol, newidiadau i ofynion Adrodd Blynyddol ar gyfer cyrff anelusennol a phasio'r ddeddf Llesiant Cenedlaethau'r Dyfodol) yn cadw pwysau ar gyrff a archwilir i ddod o hyd i ffyrdd o ddarparu mwy gyda llai.

Nododd y Pwyllgor Cyfrifon Cyhoeddus yr adroddiad ar 5 Mehefin 2017.