Cyfoeth Naturiol Cymru

Cyfoeth Naturiol Cymru yw'r mwyaf o blith y Cyrff a Noddir gan Lywodraeth Cymru, gan gyflogi 1,900 o staff ledled Cymru â chyllideb o £180 miliwn. Ffurfiwyd Cyfoeth Naturiol Cymru ym mis Ebrill 2013, a chymerodd gyfrifoldeb dros swyddogaethau Cyngor Cefn Gwlad Cymru, Comisiwn Coedwigaeth Cymru ac Asiantaeth yr Amgylchedd yng Nghymru, yn ogystal â swyddogaethau penodol gan Lywodraeth Cymru.

Cynhaliodd Archwilydd Cyffredinol Cymru adroddiad yn archwilio a oedd trefniadau llywodraethu effeithiol ar waith, neu'n cael eu datblygu, gan Gyfoeth Naturiol Cymru, sy'n cefnogi'r gwaith o gyflawni ei brif flaenoriaethau a chanlyniadau, gan gyhoeddi adroddiad ym mis Chwefror 2016.

Mae'r Pwyllgor Cyfrifon Cyhoeddus wedi trafod yr adroddiad hwn ac wedi craffu ar Gyfrifon Blynyddol Cyfoeth Naturiol Cymru ar gyfer 2015-16 wedi i’r Archwilydd Cyffredinol roi barn amodol arnynt. Mae’r Pwyllgor wedi cael gwybodaeth yn gyson am y modd y mae cynllun gweithredu Cyfoeth Naturiol Cymru yn cael ei roi ar waith yn dilyn adroddiad y Pwyllgor.

Ar 16 Gorffennaf 2018, rhoddodd yr Archwilydd Cyffredinol farn amodol ar Gyfrifon Blynyddol Cyfoeth Naturiol Cymru ar gyfer 2017-18, a chraffodd y Pwyllgor arnynt yn nhymor yr hydref 2018. Cyhoeddodd y Pwyllgor ei adroddiad ym mis Tachwedd 2018. Mae Llywodraeth Cymru a Chyfoeth Naturiol Cymru wedi ymateb i argymhellion yr adroddiad, ac ystyriodd y Pwyllgor yr ymatebion ar 28 Ionawr 2019.

Cynhaliodd y Pwyllgor sesiwn dystiolaeth gyda Chyfoeth Naturiol Cymru ym mis Chwefror 2019 i ystyried yr argymhellion a’r camau i’w cymryd yn dilyn yr adroddiad a’r adolygiad annibynnol. Cynhaliwyd dadl yn y Cyfarfod Llawn ar 13 Chwefror 2019.

Bu’r Pwyllgor yn archwilio ymhellach y camau y bu Cyfoeth Naturiol Cymru yn eu cymryd i fynd i’r afael â’r materion a godir wrth graffu ar Adroddiad a Chyfrifon Blynyddol Cyfoeth Naturiol Cymru ar gyfer 2018-19, a gafodd ei gymhwyso unwaith eto gan Archwilydd Cyffredinol Cymru ym mis Ionawr 2020. Roedd y Pwyllgor wedi bodloni ei hun bod cynnydd wedi’i wneud a bod y sefydliad wedi mynd i’r afael â’r materion a amlygwyd yn yr adroddiad.

Adroddiad a Chyfrifon Blynyddol 2018-19

Adroddiad a Chyfrifon Blynyddol 2017-18

Adroddiad a Chyfrifon Blynyddol 2015-16

Mae cyfrifoldebau’r Pwyllgor Cyllid yn cynnwys goruchwylio Swyddfa Archwilio Cymru. Cymerodd y Pwyllgor Cyllid dystiolaeth gan Archwilydd Cyffredinol Cymru ar 15 Mawrth 2017 mewn perthynas â’r oedi wrth osod cyfrifon blynyddol Cyfoeth Naturiol Cymru ar gyfer 2015-16 (Trawsgrifiad PDF, 423KB).