Ymgynghoriad

Mae Pwyllgor Cyfrifon Cyhoeddus Cynulliad Cenedlaethol Cymru yn cynnal ymchwiliad i'r drefn reoleiddio cymdeithasau tai.

Er mwyn helpu gyda’i ymchwiliad, byddai’r Pwyllgor yn croesawu eich barn ar y materion a ganlyn:

• Pa mor effeithiol yw’r fframwaith rheoleiddiol presennol ar gyfer cymdeithasau tai sydd wedi'u cofrestru yng Nghymru;
• Effeithiolrwydd ac ansawdd y trefniadau llywodraethu;
• A yw'r drefn reoleiddio bresennol yn ddull effeithiol o reoli a lliniaru risgiau drwy’r sector cyfan;
• A yw’r trefniadau cyd-reoleiddio yn effeithiol o'u rhoi ar waith;
• Lefelau tâl yr uwch-swyddogion sy'n gweithio i gymdeithasau tai.

Gwahoddiad i gyfrannu at yr ymchwiliad
Mae’r Pwyllgor yn croesawu ymatebion yn Gymraeg neu'n Saesneg, a bydd yn cynnal sesiynau tystiolaeth lafar maes o law.

Ni ddylai’r dystiolaeth fod yn hwy na phum ochr tudalen A4. Dylid rhifo’r paragraffau, a dylai’r dystiolaeth ganolbwyntio ar y materion uchod. Gweler y canllawiau i dystion sy'n darparu tystiolaeth i bwyllgorau.

Os hoffech gyflwyno tystiolaeth, anfonwch gopi electronig, (nid ar ffurf dogfen PDF, yn ddelfrydol) i SeneddArchwilio@Cynulliad.Cymru

Dylai unrhyw sylwadau ddod i law erbyn 6 Ionawr 2017.  Mae’n bosibl na fydd modd ystyried ymatebion sy'n dod i law ar ôl y dyddiad hwn.

Datgelu gwybodaeth

Mae polisi'r Cynulliad ynghylch datgelu gwybodaeth i'w weld yma. Cofiwch ystyried y manylion hyn yn ofalus cyn cyflwyno gwybodaeth i'r Pwyllgor.  Neu, mae copi caled o'r polisi hwn i'w gael drwy gysylltu â'r Clerc (0300 200 6565).