Cofnodion

Derbyniodd y Pwyllgor gofnodion y cyfarfod ar gyfer eu cyhoeddi.

 

Cwestiynodd Paul Davies nifer y datganiadau ysgrifenedig diweddar.  Roedd yn credu y dylai'r datganiad ynghylch yr 'Adolygiad Cyflenwad Tai Fforddiadwy', a gyhoeddwyd fel datganiad ysgrifenedig ddoe, fod wedi bod yn ddatganiad llafar.  Cytunodd Arweinydd y Tŷ i edrych ar y mater ymhellach.

 

Dydd Mawrth

 

·         Byddai pob pleidlais mewn perthynas â'r Bil Rheoleiddio Landlordiaid Cymdeithasol Cofrestredig (Cymru) yn digwydd yn ystod trafodion Cyfnod 3.

 

·         Cadarnhaodd Arweinydd y Tŷ y byddai'r pleidleisio ar bob eitem arall o fusnes yn cael ei gynnal cyn i drafodion Cyfnod 3 ddechrau.

 

 

·         Dywedodd y Llywydd wrth y Rheolwyr Busnes y byddai egwyl o 10 munud cyn i drafodion Cyfnod 3 ddechrau.

 

 

Dydd Mercher

 

·         Byddai'r Cyfnod Pleidleisio yn cael ei gynnal cyn y Ddadl Fer.

 

Nododd y Pwyllgor Busnes amserlen busnes y Llywodraeth ar gyfer y tair wythnos nesaf.

 

Tynnodd Arweinydd y Tŷ sylw'r Rheolwyr Busnes at y ffaith y bydd hi'n ateb y Cwestiynau i'r Prif Weinidog ar 1 Mai oherwydd y bydd y Prif Weinidog dramor.

 

Penderfynodd y Pwyllgor Busnes ar drefn busnes y Cynulliad a chytunodd i gynnwys yr eitemau o fusnes a ganlyn ar yr amserlen:

 

Dydd Mercher 2 Mai 2018 –

·         Dadl ar Adroddiad y Pwyllgor Safonau Ymddygiad 01-18 i'r Cynulliad o dan Reol Sefydlog 22.9 (15 munud)

·         Amser a neilltuwyd i Blaid Annibyniaeth y Deyrnas Unedig (60 munud)– gohiriwyd tan 9 Mai

Dydd Mercher 9 Mai 2018 -

·         Amser a neilltuwyd i Blaid Annibyniaeth y Deyrnas Unedig (60 munud)

·         Amser a neilltuwyd i Blaid Cymru (60 munud) – gohiriwyd tan 16 Mai

 

Dydd Mercher 16 Mai 2018 –

·         Cwestiynau i Gomisiwn y Cynulliad (30 munud)

·         Dadl ar Gynnig Deddfwriaethol gan Aelod (30 munud)

·         Dadl Aelodau o dan Reol Sefydlog 11.21(iv) (60 munud)

·         Amser a neilltuwyd i Blaid Cymru (60 munud)

 

·         Dewisodd Rheolwyr Busnes y cynnig canlynol ar gyfer dadl ar 2 Mai 2018

 

NNDM6695

Jane Hutt

Jenny Rathbone

 

Cynnig bod Cynulliad Cenedlaethol Cymru

 

1. Yn nodi gwaith ymchwil gan Plan International UK ar dlodi misglwyf a stigma, sy'n amcangyfrif bod un ym mhob 10 o ferched yn y DU wedi methu â fforddio cynhyrchion misglwyf.

 

2. Yn croesawu'r camau y mae sefydliadau yng Nghymru yn eu cymryd, gan gynnwys Periods in Poverty, Wings Cymru, The Red Box Project, Ymddiriedolaeth Trussell ac eraill, i fynd i'r afael â mater hwn.

 

3. Yn nodi'r adroddiad terfynol gan weithgor craffu cyngor Rhondda Cynon Taf a sefydlwyd i ddelio â darparu cynhyrchion misglwyf am ddim mewn ysgolion.

 

4. Yn galw ar Lywodraeth Cymru i:

 

a) ystyried ymchwil presennol a newydd ar effaith bosibl tlodi misglwyf a stigma ar ddysgu;

 

b) ystyried galwadau i wella addysg ar y pwnc a chynnig cynhyrchion misglwyf am ddim mewn sefydliadau addysg; ac

 

c) nodi ffyrdd i sicrhau bod cynhyrchion misglwyf ar gael i fanciau bwyd Cymru.

 

Plan International UK - 1 in 10 girls have been unable to afford sanitary wear (Saesneg yn unig)

 

Cyngor Rhondda Cynon Taf - Adroddiad terfynol gan y gweithgor craffu sy’n ymdrin â darparu cynhyrchion misglwyf am ddim mewn ysgolion (Saesneg yn unig)

 

Cefnogir gan:

John Griffiths

Julie Morgan

Jack Sargeant

Dawn Bowden

Siân Gwenllian

Jayne Bryant

Vikki Howells

Simon Thomas

Mike Hedges

Mick Antoniw

David Rees

Leanne Wood

 

 

·         Cytunodd Rheolwyr Busnes i gynnal y Ddadl Aelodau nesaf ar 16 Mai 2018, a dewiswyd y cynnig a ganlyn:

 

NNDM6682

Hefin David

Rhun ap Iorwerth

Dawn Bowden

Angela Burns

Mark Isherwood

Mandy Jones

Cynnig bod Cynulliad Cenedlaethol Cymru:

1. Yn croesawu adroddiad diweddar gan Bowel Cancer UK a Beating Bowel Cancer sy'n tynnu sylw at ddiagnosis cynnar a'i uchelgais o wella cyfraddau goroesi pobl y mae canser y coluddyn yn effeithio arnynt.

2. Yn cydnabod cyfraniad dewr cleifion canser y coluddyn yng Nghymru o ran codi ymwybyddiaeth o'r clefyd a gweithwyr gofal iechyd proffesiynol o ran gwella canlyniadau yn sgil galw cynyddol am ddiagnosis, o fewn cyfyngiadau'r gwasanaeth presennol.

3. Yn cydnabod mai canser y coluddyn yw'r canser sy'n lladd yr ail nifer fwyaf o bobl yng Nghymru ac yn cydnabod yr effaith a gaiff diagnosis cynnar ar gyfraddau goroesi a phwysigrwydd annog y cyhoedd i fanteisio ar gyfleoedd i sgrinio eu coluddion gan fod y niferoedd sy'n cael eu sgrinio wedi gostwng 1 y cant yn y 12 mis diwethaf.

4. Yn croesawu cyflwyno prawf imiwnogemegol ysgarthion (FIT) symlach a mwy cywir fel rhan o'r rhaglen profi'r coluddyn a'r potensial i wella cyfraddau goroesi canser y coluddyn.

5. Yn galw ar Lywodraeth Cymru i ddarparu rhaglen sgrinio canser y coluddyn y gall gyrraedd ei photensial llawn ymdrin â materion o amgylch:

a) y trothwy arfaethedig ar gyfer prawf imiwnogemegol ysgarthion i'w gyflwyno yn 2019;

b) heriau sy'n bodoli o fewn gwasanaethau endosgopi a phatholeg i sicrhau y gellir cyflwyno prawf imiwnogemegol ysgarthion yn y ffordd orau bosibl;

c) angen i leihau'r oedran sgrinio cymwys o 60 i 50.

Spotlight on Bowel Cancer in Wales - Early Diagnosis Saves Lives (Saesneg yn unig)

 

Cefnogir gan

Neil Hamilton

 

Cytunodd Rheolwyr Busnes â'r cais.

 

Cytunodd y Rheolwyr Busnes y byddai'n ddefnyddiol crynhoi a chyhoeddi'r canllawiau.

 

Bydd yr Ysgrifenyddiaeth yn cyflwyno papur sy'n adolygu ac yn diweddaru'r holl ganllawiau cyfredol ac yn drafftio canllawiau newydd yn ôl yr angen.

 

Cytunodd y Rheolwyr Busnes i ymgynghori â'u grwpiau, yn arbennig er mwyn ystyried a ddylid adolygu cyfansoddiad y Pwyllgor Materion Cyfansoddiadol a Deddfwriaethol yn sgil cyflwyno'r offeryn statudol mewn perthynas â Brexit.  Cytunodd y Rheolwyr Busnes y dylid ystyried hyn cyn gwneud unrhyw benderfyniadau ynghylch adolygu'r Rheolau Sefydlog.