Cofnodion

Estynnodd y Llywydd groeso i Julie James, y Gweinidog â chyfrifoldeb dros fusnes y Llywodraeth, a mynegodd ei diolch ar ran y Pwyllgor Busnes i Jane Hutt am ei chyfraniad enfawr dros nifer o flynyddoedd fel Rheolwr Busnes ac Arweinydd y Tŷ.

Cytunodd y Pwyllgor ar y cofnodion ar gyfer eu cyhoeddi.

Dydd Mawrth

·         Byddai'r Cyfnod Pleidleisio ar ôl yr eitem olaf o fusnes. 

Dydd Mercher

·         Cytunodd y Rheolwyr Busnes y byddai'r Cyfnod Pleidleisio yn cael ei gynnal cyn y Ddadl Fer.

Nododd y Pwyllgor Busnes amserlen busnes y Llywodraeth ar gyfer y tair wythnos nesaf.

Penderfynodd y Pwyllgor Busnes ar drefn busnes y Cynulliad a chytunodd i gynnwys yr eitemau o fusnes a ganlyn ar yr amserlen:

Dydd Mercher 15 Tachwedd 2017 -

·         Cynnig i gymeradwyo Cyllideb Comisiwn y Cynulliad ar gyfer 2018-19 (30 munud)

Dydd Mercher 29 Tachwedd 2017 -

·         Amser a neilltuwyd i'r Ceidwadwyr Cymreig (60 munud)

·         Amser a neilltuwyd i Blaid Cymru (60 munud)

·         Amser a neilltuwyd i Blaid Annibyniaeth y Deyrnas Unedig (60 munud)

Adolygiad o'r diwygiadau i'r Cyfarfod Llawn

Trafododd y Rheolwyr Busnes sut y mae diwygiadau diweddar i drafodion Cyfarfodydd Llawn yn gweithredu, a chytunodd i adolygu eu gweithrediad fel a ganlyn:

·         Ailenwi 'Dadleuon gan Aelodau Unigol' yn 'Dadleuon gan Aelodau';

·         Cynigion Deddfwriaethol Aelodau - roedd Rheolwyr Busnes yn fodlon ar y cyfan ar y modd y mae Cynigion Deddfwriaethol Aelodau yn gweithredu, ond gofynnodd Julie James i'r Rheolwyr Busnes barhau i gadw golwg arnynt a dychwelyd at y mater yn y flwyddyn newydd;

·         Rhaglen Ddeddfwriaethol Llywodraeth Cymru - Gofynnodd y Rheolwyr Busnes i'r Ysgrifenyddiaeth ddod â chynigion gerbron sy'n caniatáu ar gyfer digwyddiad yn dilyn patrwm penodedig, gan barchu'r angen am bleidlais, ac sydd hefyd yn caniatáu i Aelodau'r meinciau cefn allu gwneud cyfraniad sylweddol;

·         Datganiad ar y Gyllideb Ddrafft - cyflwynir Rheolau Sefydlog Drafft i wneud y fformat a gafodd ei dreialu yn un parhaol.

Nododd y Rheolwyr Busnes y papur.

Cadeirydd y Pwyllgor Materion Cyfansoddiadol a Deddfwriaethol

Nododd y Pwyllgor fod Huw Irranca-Davies wedi ymddiswyddo fel cadeirydd y Pwyllgor Materion Cyfansoddiadol a Deddfwriaethol. Penderfyniad mwyafrif y Rheolwyr Busnes oedd y dylai cadeiryddiaeth y Pwyllgor Materion Cyfansoddiadol a Deddfwriaethol barhau i gael ei dyrannu i'r Grŵp Llafur. Gwrthwynebodd Paul Davies y penderfyniad, gan nodi'r anghydbwysedd parhaus yn y modd y mae'r Cadeiryddion wedi'u dyrannu ymhlith grwpiau'r pleidiau.  Gwahoddir enwebiadau ar ddechrau'r Cyfarfod Llawn ddydd Mercher, gyda balot yn digwydd rhwng 2 a 5pm os oes angen. Byddai'r canlyniad yn cael ei gyhoeddi cyn y cyfnod pleidleisio. 

Cytunodd y Rheolwyr Busnes hefyd y dylai'r Pwyllgor Materion Cyfansoddiadol a Deddfwriaethol ddychwelyd i fod yn bwyllgor o bedwar Aelod wedi i Dafydd Elis-Thomas ymddiswyddo o'r pwyllgor.

Trefn y seddi yn y Siambr

Bydd cynllun seddi diwygiedig yn cael ei ddosbarthu cyn y Cyfarfod Llawn heddiw.

Cyfarfod Llawn heddiw - roedd y Llywydd eisoes wedi cyhoeddi bod Cyfarfod Llawn heddiw wedi'i ganslo.

Cyfarfod Llawn yfory - cytunodd y Rheolwyr Busnes y dylid canslo'r Cyfarfod Llawn yfory hefyd.

Pwyllgorau yr wythnos hon - cytunodd y Rheolwyr Busnes mai Cadeiryddion sy'n gyfrifol am eu pwyllgorau, ond y byddai'r Pwyllgor Busnes yn eu cynghori i beidio â chwrdd yr wythnos hon. Nododd y Rheolwyr Busnes fod rhai cadeiryddion eisoes wedi nodi y byddent yn canslo eu cyfarfodydd.

Y Swyddfa Gyflwyno - cytunodd y Rheolwyr Busnes y bydd y Swyddfa Gyflwyno yn parhau ar agor at ddibenion cyflwyno a gosod busnes ar gyfer yr wythnos nesaf.

Cyfarfod Llawn yr wythnos nesaf - cytunodd y Rheolwyr Busnes y bydd busnes yn ailddechrau'r wythnos nesaf.  Bydd Cwestiynau Llafar y Cynulliad a drefnwyd ar gyfer heddiw ac yfory yn cael eu gofyn yng Nghyfarfodydd Llawn yr wythnos nesaf, ac amserlen Cwestiynau Llafar y Cynulliad yn cael ei diwygio yn unol â hynny. Dywedodd Arweinydd y Tŷ wrth y Pwyllgor y byddai'r llywodraeth yn dymuno symud ei busnes o'r wythnos hon i'r nesaf, gan gadw rhai eitemau hanfodol o fusnes a drefnwyd ar gyfer yr wythnos nesaf. Byddai dadl Cyfnod 3 ar y Bil Rheoleiddio Landlordiaid Cymdeithasol yn cael ei gohirio. Cytunodd y Rheolwyr Busnes i fabwysiadu agwedd debyg tuag at fusnes y Cynulliad, a gofynnodd i'r Ysgrifenyddiaeth ddosbarthu agenda ddiwygiedig i'w chadarnhau.

Aildrefnu busnes - byddai'r Pwyllgor yn ystyried aildrefnu busnes dros y tymor canolig yn ei gyfarfod ddydd Mawrth. </AI12><TRAILER_SECTION></TRAILER_SECTION><LAYOUT_SECTION>