Cofnodion

Cafwyd ymddiheuriadau gan Paul Davies. Roedd Andrew R T Davies yn dirprwyo ar ei ran.

Cytunodd y Pwyllgor ar y cofnodion ar gyfer eu cyhoeddi.

Bydd y Cwnsler Cyffredinol yn gwneud datganiad am Ddyfarniad y Goruchaf Lys ar Erthygl 50.

Bydd y Prif Weinidog yn gwneud datganiad:"Diogelu Dyfodol Cymru": Pontio o’r Undeb Ewropeaidd i berthynas newydd ag Ewrop.

Cafodd y datganiad gan Ysgrifennydd y Cabinet dros Gymunedau a Phlant: Gweithio Gyda'n Gilydd i Greu Cymunedau Mwy Diogel ei ohirio tan 7 Chwefror.

Cafodd y ddadl ar yr Adroddiad Blynyddol ar Gydraddoldeb 2015-16, gan gynnwys Adroddiad Interim Gweinidogion Cymru ar Gydraddoldeb 2016, ei thynnu’n ôl.

Byddai'r Cyfnod Pleidleisio ddydd Mawrth yn cael ei gynnal ar ôl yr eitem olaf o fusnes. Cytunodd y Pwyllgor Busnes y cynhelid y Cyfnod Pleidleisio cyn y Ddadl Fer ddydd Mercher.

Nododd y Pwyllgor Busnes amserlen busnes y Llywodraeth ar gyfer y tair wythnos nesaf.

Penderfynodd y Pwyllgor Busnes ar drefn busnes y Cynulliad a chytunodd i gynnwys yr eitemau o fusnes a ganlyn ar yr amserlen

Dydd Mercher 15 Chwefror 2017 –

• Dadl ar adroddiad y Pwyllgor Cydraddoldeb, Llywodraeth Leol a Chymunedau ar ei waith craffu ar ôl deddfu ar Ddeddf Trais yn erbyn Menywod, Cam-drin Domestig a Thrais Rhywiol (Cymru) 2015 (60 munud).
• Dadl gan Aelodau Unigol o dan Reol Sefydlog 11.21(iv) (60 munud)
• Amser a neilltuwyd i Blaid Cymru (60 munud)

Ystyriodd y Pwyllgor Busnes lythyr gan Gadeirydd y Pwyllgor Deisebau yn cadarnhau eu bod yn fodlon â’r  cynigion i ddiwygio'r Rheolau Sefydlog ac i dreialu trefn newydd ar gyfer ystyried cynnal dadl ar ddeisebau sydd wedi cael 5,000 o lofnodion yn y Cyfarfod Llawn.

Cytunodd y Rheolwyr Busnes hefyd ag awgrym y Pwyllgor Deisebau i gyflwyno’r newidiadau ar 8 Mawrth. 

Gofynnodd y Rheolwyr Busnes am adroddiad drafft ar y newidiadau i'r Rheolau Sefydlog er mwyn iddynt eu hystyried mewn cyfarfod yn y dyfodol.