Cyfarfodydd

Dywedodd Gareth Watts y byddai'r gofrestr risg gorfforaethol yn cael ei chyflwyno i ACARAC ym mis Chwefror a chytunodd y Bwrdd nad oedd angen adolygiad dwfn gan ACARAC ar yr achlysur hwn.

Rhoddodd Dave Tosh amlinelliad i’r Bwrdd o’r adolygiad risgiau corfforaethol cyfredol a’r rhai sy’n dod i’r amlwg, a’r gofrestr wedi’i diweddaru, a gwahoddodd y Penaethiaid Gwasanaethau i roi gwybod am unrhyw risgiau corfforaethol newydd a nodwyd gan Hyrwyddwyr Risg, neu am newidiadau i’r gofrestr o risgiau cyfredol.

O ran y risg presennol mewn cysylltiad â’r broses Brexit a goblygiadau gadael yr UE, cyfarfu’r Grŵp Llywio Newid Cyfansoddiadol ar 6 Rhagfyr ac amlinellodd gynlluniau’r Gweithgor Brexit i gynllunio senarios ym mis Ionawr, a byddai hyn yn cyfrannu at y gofrestr risg a’r prosesau cynllunio corfforaethol.

Nododd y Bwrdd newidiadau i’r gofrestr yn dilyn yr adolygiad diwethaf, a thrafododd ddau risg newydd a amlinellir ar ffurf Risg ar Dudalen (ROAP). Cydnabuwyd nad oedd yr adolygiad capasiti ROAP yn nodi’r holl reolaethau sydd ar waith, ac roedd Gareth Watts a Kathryn Hughes yn ystyried a ddylid darparu disgrifiad manylach. Fodd bynnag, fel cofnod lefel gyntaf, roedd yn darparu crynodeb ar gyfer canolbwyntio ar risg a lliniaru risg.

Roedd y ROAP sy’n cofnodi’r risg o aflonyddu yn nodi’r gwaith presennol neu waith sydd ar y gweill, ynghyd ag amcanion tymor hwy i’w dilyn. Disgrifiodd Craig Stephenson gymhlethdod y gwaith o alinio pob elfen o dan un cod, a’r effeithiau ar amserlenni a busnes y Cynulliad, ac y dylai’r rhain gael eu hystyried yn y risg, ynghyd â sut y cânt eu trin. Argymhellodd y Bwrdd y dylid cyfathrebu’n ehangach am yr adnoddau sydd ar gael, drwy arddangos arwyddion syml o gwmpas yr adeilad.

Cytunodd y Bwrdd Rheoli fod y ddau risg i gael eu hychwanegu at y gofrestr gorfforaethol.

Trafododd y Bwrdd y gwaith o reoli’r risgiau rhyng-gysylltiedig o ran diwygio a newid cyfansoddiadol, capasiti a phwysau ariannol, a nododd y byddai’r adolygiad capasiti yn cynorthwyo i ddarparu rhai atebion. Cyflwynwyd papur cryno i’r Pwyllgor Archwilio a Sicrwydd Risg (ACARAC) i roi sicrwydd iddo, a chroesawodd y Pwyllgor y papur, a chafwyd sicrwydd yn ei sgîl am y camau a gymerwyd i reoli proffil risg cymhleth o’r fath. Cytunodd y Bwrdd fod y papur yn darparu cofnod defnyddiol a nodyn cyfathrebu defnyddiol i’r staff.

CAMAU I’W CYMRYD:

·                Y Tîm Llywodraethu i adolygu templed y Risg ar Dudalen (ROAP);

·                Craig Stephenson i drafod arwyddion gyda’r gweithgor;

·                Anna Daniel i ailosod y ddogfen ar reoli risgiau rhyng-gysylltiedig er mwyn ei dosbarthu i’r staff;

·                Dave Tosh, Gareth Watts a Kathryn Hughes i adolygu’r risgiau rhyng-gysylltiedig i’w diweddaru ac i nodi’r hyn a oedd nawr yn broblemau yn hytrach na risgiau.

Arweiniodd Gareth Watts y Bwrdd drwy'r adolygiad rheolaidd o'r risgiau corfforaethol presennol a'r risgiau sy'n dod i'r amlwg a'r gofrestr ddiweddaraf. Nododd y Bwrdd fod Grŵp Llywio Newid Cyfansoddiadol wedi adolygu'r risgiau lefel uchel a nodwyd gan y gweithgorau ar ddiwygio'r Cynulliad, Brexit a Deddf Cymru, a'r rheolaethau sydd ar waith, a'i fod wedi dod i'r casgliad eu bod yn foddhaol. Nododd y Bwrdd hefyd y newid i'r risg mewn perthynas â pharatoadau GDPR.

Cytunodd y Bwrdd Rheoli i ychwanegu'r risg sy'n ymwneud â'r anghenion o ran adeiladau i'r gofrestr gorfforaethol a chyflwyno ROAP ar yr Adolygiad Capasiti i gyfarfod yn y dyfodol.

Ystyriodd y Bwrdd a oedd y risgiau corfforaethol cyfredol yn adlewyrchu effaith gyfun y broses diwygio a newid cyfansoddiadol yn ddigonol, gan gysylltu hynny â chapasiti a phwysau ariannol. Nodwyd yr angen i sicrhau bod dealltwriaeth briodol o'r sefyllfa ariannol o fewn timau.

CAMAU I’W CYMRYD:

·                Tîm Gareth i gasglu'r rhestr o reolaethau sydd eisoes ar waith o fewn y sefydliad i reoli risg; ac

·                aelodau'r Bwrdd Rheoli i ddefnyddio nodyn y Bwrdd i'r staff fel sail i drafod y broses ar gyfer rheoli risg a'r angen am adnabod ac adrodd yn effeithiol am risgiau ar bob lefel o'r sefydliad.

Eitem lafar

Atgoffodd Dave Tosh y Bwrdd fod dechrau'r tymor newydd yn gyfle i ddiweddaru cofrestrau risg gorfforaethol ar draws y sefydliad.

Dylid parhau i roi gwybod ar lefel y Gwasanaeth am risgiau newydd a risgiau sy'n newid, a dylai Penaethiaid Gwasanaeth a Hyrwyddwyr Risg ystyried beth y dylid ei nodi ar gyfer y Gofrestr Risg Gorfforaethol, cyn adolygiad ffurfiol y Bwrdd Rheoli fis Hydref.

1.1        CAM I'W GYMRYD:

·  Gofynnodd y Bwrdd Rheoli i'r cofrestrau risg gorfforaethol gael eu hadolygu a'u diweddaru cyn eu trafod yn ffurfiol yng nghyfarfod y Bwrdd Rheoli ar 23 Hydref.

Cynhaliodd y Bwrdd Rheoli ei adolygiad rheolaidd o'r gofrestr risg gorfforaethol, a oedd wedi'i diweddaru i adlewyrchu statws presennol y risgiau.

Yn ei gyfarfod ym mis Mehefin, roedd ACARAC wedi adolygu'r gofrestr risg gryno gan nodi'r symudiad mewn risgiau, a chafodd y wybodaeth ddiweddaraf am y trafodaethau parhaus yn y Bwrdd Rheoli ar effaith gyfunedig y risgiau a wynebir. Yn ogystal, cynhaliwyd archwiliad critigol o barodrwydd y sefydliad ar gyfer y Rheoliad Diogelu Data Cyffredinol a fydd yn dod i rym ym mis Mai 2018. Roedd ACARAC yn fodlon ar y cynllun gweithredu, gan ddweud ei fod mewn lle da o gymharu â sefydliadau eraill.

Cytunodd y Bwrdd ar y newidiadau a'r argymhellion a gynigiwyd.

Trafododd y Bwrdd Rheoli y risgiau presennol a newydd ar lefel gorfforaethol, eu statws, a natur ryng-gysyllitedig y risgiau i gyflawni'r blaenoriaethau strategol, newid cyfansoddiadol a diwygio.

Nododd y Bwrdd nifer o risgiau newydd, gan gynnwys yr ymgynghoriad cyfredol ar ailenwi'r Cynulliad; datblygu Senedd Ieuenctid; prosiectau o ran adeiladau sydd wedi'u cynllunio ar gyfer y dyfodol; a'r pwysau ariannol ar gyllidebau wrth gyflwyno prosiectau a strategaethau mewn modd amserol.

Cytunodd y Bwrdd i'r canlynol:

·              bod y risg capasiti corfforaethol yn cael ei newid yn ôl i fod yn risg weithredol; a bod sgôr gweddilliol y risg yn ymwneud â'r broses o adael yr UE yn cael ei newid i ganolig i adlewyrchu lle yr oedd yn amhosibl rhoi cynlluniau lliniaru ar waith;

·              diweddaru'r risg yn ymwneud â phwysau ariannol ac adolygu opsiynau yn ddiweddarach;

·              dylai'r risgiau sy'n ymwneud â diogelwch gael eu hadolygu'n agos gyda nodyn i staff yn eu sicrhau o hynny. Dylai staff â phryderon penodol siarad â'r Pennaeth Diogelwch;

·              byddai nodyn yn cael ei baratoi i staff fel canllaw ar y ffordd i gyfeirio at y Cynulliad tan i unrhyw newid yn dilyn yr ymgynghoriad gael ei weithredu'n ffurfiol.

Cyflwynodd Dave y papur Risgiau Corfforaethol, gan roi gwybod i’r Bwrdd ei fod yn gyfle iddynt hwy adolygu risgiau corfforaethol presennol y Cynulliad a risgiau sy’n dod i’r amlwg.

Cytunodd y Bwrdd ar yr argymhellion i:

·                ychwanegu risg diogelwch personol a risg diogelwch i’r Gofrestr Risg Corfforaethol;

·                parhau i fonitro’r risg diogelwch personél ar lefel gwasanaeth;

·                ychwanegu’r risg Rheoliad Cyffredinol Data a Diogelu at y Gofrestr Risgiau Corfforaethol, gyda hyd targed o tan fis Mai 2018;

·                parhau i fonitro ymwybyddiaeth yr Aelodau o risg Diogelu Plant ar lefel gwasanaeth, gyda phenderfyniad i’w wneud yn y dyfodol o ran pa wasanaeth a ddylai berchenogi’r risg; ac

·                yn dilyn yr ystyriaeth gan ACARAC, bod y risg o ran anghenion llety y Cynulliad ar hyn o bryd, ac yn y dyfodol, yn cael ei ychwanegu at y Gofrestr Risg Corfforaethol.

Nododd y Bwrdd hefyd y risgiau newydd neu risgiau sy’n dod i’r amlwg canlynol:

·                Sefydlu Senedd Ieuenctid. Rhoddodd Non wybod i’r Bwrdd fod y gweithgor Senedd Ieuenctid wedi ystyried y risgiau sy’n gysylltiedig â’r prosiect ac y bydd yn gwneud hynny eto yn ei gyfarfod nesaf;

·                y diffyg rhyngweithio strategol a chydlynol gyda’r cyfryngau, a oedd wedi cael ei ychwanegu at y gofrestr lefel gwasanaeth.

Trafododd y Bwrdd ychwanegu risg newydd at y Gofrestr Risgiau Corfforaethol ynghylch newid cyfansoddiadol. Y bwriad fyddai i hwn grynhoi casgliad o risgiau tebyg sy’n gysylltiedig â’r newidiadau sy’n digwydd, er mwyn darparu’r oruchwyliaeth gyffredinol sy’n ofynnol gan y Bwrdd.

CAMAU I’W CYMRYD:

·                Dave i weithio gydag Adrian, Anna a Non, i ddrafftio nodyn manwl a’i ddosbarthu ar gyfer trafodaeth ehangach.

Papur 2 – Risg Corfforaethol

Papur 2 – Atodiad A – Crynodeb Risg

                Atodiad B – Risgiau Corfforaethol wedi’u nodi

      Atodiad C – Ymateb Negyddol Tuag At Gynyddu Maint y Cynulliad

      Atodiad D – Ffurflen Asesu Risg – Bygythiadau Seiber

      Atodiad E  - Ffurflen Asesu Risg - Pwysau Cyllidebol Cynyddol

      Atodiad F – Asesiad Manwl o Risgiau’n ymwneud a Llety  

Adolygodd y Bwrdd Rheoli risgiau corfforaethol presennol y Cynulliad a'r risgiau sy'n dod i'r amlwg. Mae'r gofrestr risg yn adlewyrchu'r statws cyfredol o ran risgiau, a'r newidiadau y cytunwyd arnynt yn y cyfarfod a gynhaliwyd ar 12 Rhagfyr 2016. Cytunwyd ar y rhain, ond gofynnwyd am y wybodaeth ddiweddaraf ynghylch dynodiad yr ystâd o ran diogelwch.

Cytunodd y Bwrdd ar yr argymhellion a ganlyn:

·                cadw'r risg ynghylch newid enw'r Cynulliad ar y gofrestr gorfforaethol, ond bod y dull o reoli'r risg yn ymgorffori bod yn rhagweithiol ynghylch annog y rhai sydd â barn gadarnhaol am y newidiadau i sicrhau bod eu lleisiau'n cael eu clywed;

·                ychwanegu bygythiadau seiber at y gofrestr gorfforaethol;

·                ychwanegu'r risgiau sy'n deillio o bwysau ariannol ac sy'n ymwneud ag enw da'r sefydliad i'r gofrestr gorfforaethol, ond eu haralleirio fel eu bod yn ymestyn y tu hwnt i'r rhaglen ddiwygio;

·                dileu'r risg sy'n ymwneud â "setliad" Bil Cymru o'r gofrestr gorfforaethol a rheoli risgiau ar lefel gwasanaeth.

·                ychwanegu cynigion sy'n ymwneud â llety i'r gofrestr gorfforaethol. Bydd y cam hwn yn destun archwiliad beirniadol yn ystod cyfarfod y Pwyllgor Archwilio a Sicrwydd Risg ar 6 Chwefror.

Trafododd y Bwrdd Rheoli risgiau cyfredol a newydd ar lefel gorfforaethol a chytunwyd ar argymhellion i ailddosbarthu'r risg o ran gallu dwyieithog fel y câi ei reoli ar lefel gwasanaeth ynghyd â'r risg lefel gwasanaeth presennol sy'n ymwneud â chydymffurfio â'r Cynllun Ieithoedd Swyddogol. Cytunwyd hefyd i newid statws dau risg corfforaethol i risgiau statig, ar gyfer capasiti a diogelwch yr ystâd. Gwnaed y newidiadau yn sgil y rheolaethau yn bod yn rhai cadarn, effeithiol ac yn cael eu hadolygu'n rheolaidd. Cytunwyd y byddai'r risgiau newydd yn cael eu creu i fonitro dau faes penodedig arall o ddiogelwch. 

Nododd y Bwrdd nifer o risgiau newydd sy'n ymwneud â phwysau yn deillio o ddiwygiadau cyfansoddiadol yn y dyfodol, gan gynnwys: yr ymgynghoriad cyfredol ar ailenwi'r Cynulliad, gan nodi bod dros 900 o ymatebion wedi dod i law hyd yma; datblygu Senedd Ieuenctid; prosiectau o ran adeiladau sydd wedi'u cynllunio ar gyfer y dyfodol; a'r pwysau ariannol ar gyllidebau wrth gyflwyno prosiectau a strategaethau mewn modd amserol.

CAMAU GWEITHREDU: Dave Tosh a Nia Morgan i gytuno ar ffurf y geiriau ar gyfer risg sy'n ymwneud â chyfyngiadau ariannol.

Non Gwilym, Anna Daniel a Lowri Williams i baratoi cynllun ar gyfer pryd y gallai risgiau ddod i'r amlwg mewn perthynas â chapasiti'r ystâd ac anghenion o ran adeiladau yn y dyfodol, a chysylltu mewn perthynas â chyfathrebu.

Cytunwyd y gallai'r risg sy'n ymwneud â phenderfyniadau'r Bwrdd Taliadau gael ei dynnu oddi ar y gofrestr ac y byddai'r Bwrdd Rheoli yn ailedrych ar y risgiau o ran darparu canllawiau ar ddiogelu plant a phobl ifanc yn yr adolygiad nesaf o risgiau corfforaethol.

Ystyriodd y Bwrdd Rheoli risgiau cyfredol a newydd ar lefel gorfforaethol ac, yn benodol, effaith strategaeth newydd y Comisiwn a’r risgiau sy’n dod i’r amlwg o ran effaith canlyniad Refferendwm yr UE ar y sefydliad. Er bod llawer o ansicrwydd ynghylch effaith y canlyniad, ac roedd y sefydliad yn gwneud yn dda o ran lliniaru, ond gan feddwl ymlaen, byddai paratoi a sicrhau bod y Comisiwn wedi ymrwymo o ran adnoddau, yn fater doeth i’w gynnwys fel risg corfforaethol. Cytunodd y Bwrdd fod cael trafodaeth sy’n canolbwyntio ar risgiau posibl yn angenrheidiol, gyda golwg ar osgoi iddo fod yn fater sy’n gorfod aros ar y gofrestr am yr hirdymor. Cytunwyd y byddai Anna Daniel yn arwain ar y mater o asesu risgiau o ran goblygiadau canlyniad y Refferendwm.

Gofynnwyd i’r Bwrdd ystyried argymhellion i dynnu pedwar risg o’r gofrestr risgiau corfforaethol o ystyried arferion rheolaeth, terfynu neu liniaru effeithiol y risgiau hynny ac, os felly, a ddylent gael eu monitro ar lefel gwasanaeth. Cytunodd y Bwrdd ar y pedwar argymhelliad.

Yn ogystal, nodwyd rhai newidiadau i’r gofrestr i adlewyrchu statws presennol risgiau. Cytunodd Dave Tosh i adolygu geiriad y risg yn ymwneud ag ymosodiad terfysgol / arfau yn dilyn digwyddiadau diweddar (Cyf: Sec009).

Ystyriodd y Bwrdd y risg yn ymwneud â phenderfyniadau’r Bwrdd Taliadau, a oedd yn cael ei reoli’n dda, a chytunodd i’w ystyried eto ar adeg yr adolygiad nesaf. Trafodwyd y risg yn ymwneud â newidiadau o ran uwch reolwyr hefyd.

Cytunodd y Bwrdd i neilltuo cyfarfod i drafod rheoli absenoldeb, felly gohiriwyd yr eitemau eraill tan agenda cyfarfod mis Gorffennaf.

Adolygwyd y gofrestr a’r dangosfwrdd risg corfforaethol presennol a chytunwyd fod cynnydd da wedi’i wneud o ran nodi a rheoli risgiau corfforaethol yn weithredol.

Byddai Chris Warner yn darparu ‘risg ar dudalen’ (ROAP) ar ddiogelu, i’r Bwrdd ei ystyried yn ei adolygiad nesaf o risg.

Trafododd y Bwrdd y risgiau o ran refferendwm yr UE ac roedd arweiniad yn cael ei baratoi ar hyn o bryd ar gyfer staff ac Aelodau fel mater o flaenoriaeth. Cytunwyd ar y ‘risg  ar dudalen’.

Roedd y pontio i’r Pumed Cynulliad ar fin digwydd ac roedd meysydd o bryder o ran cyflawni cyfrifoldebau. Gofynnwyd i Benaethiaid fynd i’r afael â’r rhain yn eu meysydd, os a phan y byddent yn codi.

Cytunwyd ar y ‘risg ar dudalen’ o ran rheolaeth ariannol, gyda rhai ychwanegiadau.

Ystyriodd y Bwrdd Rheoli y risgiau cyfredol a newydd ar lefel gorfforaethol a nododd y cynnydd o ran lliniaru risgiau a statws presennol pob risg.

Yn dilyn yr adolygiad o'r risg Gallu Corfforaethol ar lefel Bwrdd ac ACARAC, diweddarwyd y disgrifiad o'r risg i adlewyrchu'r adborth.

Ystyriodd y Bwrdd a ddylid rheoli'r risgiau ynghylch pontio i'r Pumed Cynulliad fel risg corfforaethol, a chytunwyd eu bod yn cael eu rheoli'n rhagweithiol o fewn pob llinyn ac y dylid parhau i wneud hynny.

Mewn perthynas ag adroddiad 'Risg ar dudalen' y Cynllun Ymadael Gwirfoddol, dywedodd Non Gwilym y byddai'r rheolwr cyfryngau yn adolygu'r camau i'w cymryd.

Byddai'r risg capasiti Dwyieithrwydd yn cael ei ddiweddaru i adlewyrchu risgiau ynghylch newidiadau posibl i'r gofynion yn y Pumed Cynulliad.

Codwyd y mater o absenoldeb oherwydd salwch a chytunwyd y byddai'r Bwrdd yn trafod hyn yn fanylach mewn cyfarfod yn y dyfodol. Hefyd, codwyd y mater o ddiogelu plant ac oedolion sy’n agored i niwed mewn perthynas â'r paratoadau sydd eu hangen i liniaru'r risgiau ynghylch y trosiant uchel o ran Aelodau yn ystod y cyfnod pontio i'r Pumed Cynulliad.

Trafododd y Bwrdd Rheoli'r risgiau cyfredol a’r risgiau sy’n dod i’r amlwg ar lefel gorfforaethol a nododd diweddariadau allweddol. Dywedwyd wrth y Bwrdd y byddai'r Pwyllgor Archwilio a Sicrwydd Risg yn adolygu sut mae'r risg yn ymwneud â chapasiti corfforaethol yn cael ei reoli yn ei gyfarfod nesaf ym mis Chwefror.

Cyflwynodd Dave Tosh adroddiad digwyddiad risg ynglŷn â threfniadau newydd ar gyfer fetio diogelwch a dywedodd fod trafodaethau ar y gweill gyda Heddlu De Cymru ynghylch darpariaeth yn y dyfodol.

Cytunwyd y dylid ychwanegu risgiau tymor byr o ran y cynllun ymadael at y gofrestr.

Camau i’w cymryd:

Dave Tosh a Sulafa Thomas i nodi a oes risgiau'n ymwneud â throsglwyddo i'r Pumed Cynulliad y dylid eu hychwanegu at y gofrestr gorfforaethol.

Penaethiaid gwasanaeth i sicrhau bod prosesau rheoli risg yn cael eu dilyn yn briodol yn eu meysydd hwy

MB 12-15 Papur 6 – Risgiau Corfforaethol – Papur Clawr

MB 12-15 Papur 6 – Crynodeb Risgiau Corfforaethol

Adolygodd y Bwrdd Rheoli y gofrestr o risgiau corfforaethol a ddiwygiwyd yn dilyn cyfarfod blaenorol y Bwrdd pan gynhaliwyd adolygiad llawn o’r risgiau.

Cytunwyd y byddai Gareth Watts yn cyfarfod â pherchnogion risg eto i drafod cwmpas eu risgiau ac i ystyried a yw'r geiriad yn adlewyrchu hynny’n effeithiol.

Roedd y Bwrdd Rheoli wedi cytuno i gynnal trafodaeth estynedig ar reoli risg corfforaethol i gymryd golwg cynhwysfawr ar yr holl risgiau cyfredol ac i benderfynu pa risgiau sy’n parhau a pha risgiau y gellir eu cau, ynghyd â chymryd rhagolwg ar risgiau posibl a all godi hyd at ddiwedd y Pedwerydd Cynulliad a thu hwnt.

Cytunodd y Bwrdd ar nifer o newidiadau i’r gofrestr:

·                Y dylai’r sgôr gweddilliol ar gyfer y risg o ran capasiti corfforaethol gael ei godi i ‘uchel’, gan y byddai pwysau ar gapasiti ynghyd â chyfyngiadau ariannol yn parhau i dyfu;

·                Pontio i’r Pumed Cynulliad - Adrian Crompton a Sulafa Thomas i adolygu risg ac ystyried elfennau y tu hwnt i’n rheolaeth;

·                Anna Daniel a Kathryn Hughes i addasu’r risg Newid Cyfansoddiadol;

·                Anna Daniel a Non Gwilym i ystyried y risg o ran canfyddiadau negyddol o’r Cynulliad;

·                Diogelwch ffisegol - risg i’w addasu i gynnwys amddiffyn rhag ymosodiadau terfysgol.

Cafodd y risg o ran diogelwch gwybodaeth ei dynnu oddi ar y gofrestr gorfforaethol a newid i fod yn risg i wasanaeth, a chytunodd Dave Tosh i ymchwilio i’r ymholiad a godwyd ynghylch diogelu data.

Cytunodd y Bwrdd i dynnu nifer o risgiau oddi ar y gofrestr a oedd naill ai wedi’u datrys neu lle oedd gwaith wedi’i wneud i liniaru’r risgiau hyn.

Gwnaeth y Bwrdd ei adolygiad cyfnodol o'r Gofrestr Risgiau Corfforaethol gan nodi a oedd unrhyw risgiau wedi dod i'r amlwg ag arwyddocâd corfforaethol.

Cytunodd y Bwrdd i gael gwared ar y risg Parhad Busnes, yn dilyn cynnydd pellach a'r ymarfer parhad llwyddiannus a wnaed ym mis Ebrill. Bydd y risgiau'n parhau i gael eu rheoli drwy'r System Rheoli Parhad Busnes.

Cytunwyd hefyd i gael gwared ar y risg ynghylch defnyddio cyfryngau cymdeithasol oherwydd y rheolaethau a roddwyd ar waith. Bydd y risg yn cael ei reoli ar lefel gwasanaeth.

Hefyd, ystyriodd y Bwrdd y risgiau 'statig' (y rhai a oedd yn wynebu'r Cynulliad bob amser ond sydd angen ffocws tymor hwy). Nodwyd bod angen i'r Bwrdd sicrhau bod gan y risgiau a'r materion statig ddigon o amlygrwydd.

Camau i’w cymryd: Cytunwyd, pan gaiff risgiau corfforaethol eu trafod nesaf, y byddai'n cael ei roi gyntaf ar yr agenda er mwyn caniatáu am adolygiad llawn, gyda ffocws ar lle dylai risgiau gael eu rheoli a beth sy'n cyfrif fel materion.

Gwnaeth y Bwrdd ei adolygiad cyfnodol o'r Gofrestr Risgiau Corfforaethol gan nodi a oedd unrhyw risgiau wedi dod i'r amlwg ag arwyddocâd corfforaethol.

Bydd y Pwyllgor Archwilio a Sicrwydd Risg yn edrych ar y risgiau yn ymwneud â newid cyfansoddiadol yn ei gyfarfod ar 20 Ebrill. Hefyd, o ystyried lefel y bygythiad presennol, holodd y Pwyllgor a ddylid rheoli risgiau diogelwch yn gorfforaethol. Byddai'n ystyried hyn ymhellach yn ei gyfarfod ar 8 Mehefin.

Ystyriodd y Bwrdd Rheoli'r risg niwed i enw da yn dilyn cyhoeddiadau Dydd Gŵyl Dewi ar newid cyfansoddiadol a chytunodd bod y risg wedi pasio ac, o ganlyniad i'r gwaith paratoi a wnaed, roedd canlyniad da i enw da'r Llywydd a'r Cynulliad. Cytunwyd nad oedd angen rhoi newid cyfansoddiadol ar y gofrestr gorfforaethol ar hyn o bryd.

Roedd y materion yn ymwneud â diogelwch wedi cael ymateb ac fe wnaed newidiadau i liniaru'r risgiau, gan gynnwys rhaglen fetio a sesiynau fideo Stay Safe ar gyfer staff.  Cytunwyd nad oedd yn risg gorfforaethol ar hyn o bryd, er y dylid adolygu'r mater yn rheolaidd i ystyried a oes unrhyw beth wedi newid.

Cytunwyd y byddai newid cyfansoddiadol, serch hynny, yn bwnc priodol i'r Pwyllgor Archwilio a Sicrwydd Risg ei archwilio, gan edrych ar y gwaith a wnaed i sicrhau'r canlyniadau yn dilyn y cyhoeddiadau Dydd Gŵyl Dewi ac i sicrhau y gwneir popeth posibl i baratoi ar gyfer newidiadau yn y dyfodol. Bydd Anna Daniel yn paratoi briff ar gyfer hyn ac yn mynychu'r cyfarfod.

Cynhaliodd y Bwrdd eu hadolygiad cyfnodol o'r gofrestr risg gorfforaethol gan gynnwys sgan cyffredinol am risgiau posibl. Ystyriodd y Bwrdd a ddylid codi Rheoli Rhaglenni a Phrosiectau fel risg corfforaethol, ond cytunodd bod digon o reolaethau ar waith a monitro rheolaidd gan y Bwrdd Rheoli.

Ystyriodd y Bwrdd ymhellach a ddylai'r prosiect Teleffoni gael ei godi fel risg gorfforaethol, gan fod terfyn amser pendant i adael y contract presennol, a chytunwyd ar hynny. Ymhlith y nifer fawr o reolaethau a mesurau lliniaru dywedodd Dave Tosh fod trafodaethau ar y gweill gyda'r cyflenwr ynghylch opsiynau i ymestyn y cytundeb os fydd angen.

Dywedodd Non Gwilym bod y cyfryngau cymdeithasol yn dal yn risg gorfforaethol hyd nes y bydd Rheolwr Cyfryngau Cymdeithasol yn cael ei benodi, ond dylai hyn ddigwydd yn fuan.

Adolygodd y Bwrdd y siart cryno sy'n amlinellu tebygolrwydd ac effaith pob risg gorfforaethol a chytunodd y byddai'n ddefnyddiol i adolygu'r fformat.

Camau i’w cymryd: Dave Tosh a Kathryn Hughes i ystyried fformatau amgen a fyddai'n gwneud y wybodaeth yn fwy ystyrlon a'u cyflwyno gyda'r diweddariad nesaf

Cynhaliodd y Bwrdd ei adolygiad cyfnodol o'r gofrestr risg gorfforaethol, gan gynnwys sganio'r gorwel ar gyfer risgiau posibl. Cytunodd y Bwrdd i ddileu'r risgiau ynghylch diogelu plant, TGCh a'r Cynllun Ieithoedd Swyddogol, gan fod y camau lliniaru wedi gostwng y risgiau hynny i lefelau hylaw, sydd yn caniatáu iddynt orwedd ar lefel Gwasanaeth.

Trafodwyd y risg ynghylch diogelwch, ond cytunwyd y byddai'r Bwrdd Rheoli yn ystyried a ddylid codi lefel y risg i'r lefel gorfforaethol yn dilyn yr adolygiad presennol. Cytunodd y Bwrdd hefyd: i ymestyn y risg ynghylch capasiti corfforaethol i dymor yr haf 2015 er mwyn caniatáu amser ar gyfer recriwtio; i adael y risg ynghylch defnyddio cyfryngau cymdeithasol ar y gofrestr hyd nes y bydd hyfforddiant ar y polisi wedi'i gwblhau; ac y byddai Anna Daniel yn paratoi dadansoddiad risg ac yn ystyried holl sgil-effeithiau'r risgiau ynghylch y penderfyniadau a wneir gan y Bwrdd Taliadau.

Trafododd y Bwrdd a ddylid cymryd asesiad risg i ystyriaeth mewn perthynas â phob papur penderfyniad yn y dyfodol. Cytunodd y Bwrdd y gallai fod yn briodol cynnwys pennawd yn nhempledi'r papurau er mwyn sicrhau bod y mater hwn yn cael sylw ac i ddarparu trywydd archwilio. Byddai Virginia Hawkins yn ystyried geiriad priodol.